EFORU એન્ટરટેઈનમેન્ટની આગામી ગુજરાતી ફિલ્મ ‘વાટ લાગી’નું શુભ મુહૂર્ત, ફિલ્મમાં કોમેડી અને સસ્પેન્સનો જબરદસ્ત ડોઝ

ગુજરાતી ફિલ્મ જગત અત્યારે સુવર્ણકાળમાંથી પસાર થઈ રહ્યું છે, ત્યારે પ્રેક્ષકોને કંઈક હટકે અને પરિવાર સાથે માણી શકાય તેવું કન્ટેન્ટ પીરસવા માટે EFORU એન્ટરટેઈનમેન્ટ, Ambigramy અને ડિવાઈન પ્રોડક્શન હાઉસ સજ્જ થયા છે. આ સહયોગ અંતર્ગત આગામી મોસ્ટ અવેટેડ ફિલ્મ ‘વાટ લાગી’નું શુભ મુહૂર્ત ફિલ્મના મેકર્સ અને સ્ટારકાસ્ટની ઉપસ્થિતિમાં સંપન્ન થયું છે. આ પ્રસંગે નિર્માતા -નિલેશભાઈ મોદી, અમિત વેડાવાલા, પ્રેમલ ત્રિવેદી તથા  ડાયરેક્ટર પાર્થ શુક્લા અને સ્ટારકાસ્ટ ભવ્ય ગાંધી, પ્રેમ ગઢવી, ઓમ ભટ્ટ, દીપ વૈદ્ય ઉપસ્થિત રહ્યા હતા.

યુવા પેઢીના લોકપ્રિય અભિનેતા ભવ્ય ગાંધી અને સુંદર અભિનેત્રી જીનલ બેલાણી આ ફિલ્મમાં મુખ્ય ભૂમિકામાં જોવા મળશે. તેમની સાથે પ્રેમ ગઢવી, ઓમ ભટ્ટ અને દીપ વૈદ્ય જેવા પ્રતિભાશાળી કલાકારો પોતાની અદાકારીના કામણ પાથરશે. ફિલ્મનું નિર્દેશન જાણીતા ડાયરેક્ટર પાર્થ શુક્લા કરી રહ્યા છે, જ્યારે સિનેમેટોગ્રાફી (D.O.P) ની જવાબદારી પ્રતિક પરમાર સંભાળી રહ્યા છે.

‘વાટ લાગી’ એ એક કોમેડી સસ્પેન્સ થ્રિલર ફિલ્મ છે. નિર્માતાઓના જણાવ્યા અનુસાર, ફિલ્મનું ટાઈટલ જેટલું કેચી છે, વાર્તા પણ એટલી જ રોમાંચક અને ટ્વિસ્ટથી ભરેલી છે. આ ફિલ્મનું શૂટિંગ ફેબ્રુઆરી માસથી જ શરૂ થઈ રહ્યું છે અને તેને ઓક્ટોબર-નવેમ્બર 2026ની આસપાસ રિલીઝ કરવાની યોજના છે.

આ મેગા પ્રોજેક્ટ પાછળ મેન્ટર નિલેશભાઈ મોદી અને અનુભવી નિર્માતાઓની ટીમ અમિત વેડાવાલા (EFORU એન્ટરટેઈનમેન્ટ), પ્રેમલ ત્રિવેદી, શ્રીકાંત જાની (Ambigramy) અને અમરીશ ભીમાણી, નિલેશ પટેલ (ડિવાઇન)=કાર્યરત છે. નિર્માતાઓએ જણાવ્યું હતું કે, “અમારો ઉદ્દેશ્ય માત્ર મનોરંજન પૂરતો સીમિત નથી, પણ ગુજરાતી સિનેમાને વૈશ્વિક ફલક પર લઈ જવાનો છે. આ ફિલ્મ થિયેટરોની સાથે આંતરરાષ્ટ્રીય સ્તરે અને લોકપ્રિય OTT પ્લેટફોર્મ પર પણ ધૂમ મચાવશે.”