ફિલ્મ રિવ્યુ: ‘ધરપકડ’

આજે રિલીઝ થયેલી ફિલ્મ ‘ધરપકડ’ ગુજરાતી સિનેમા માટે એક સીમાચિહ્નરૂપ સાબિત થઈ શકે છે. ભારતની સૌપ્રથમ ‘ડિજિટલ અરેસ્ટ’ સ્કેમ પર આધારિત આ ફિલ્મ આજના સમયની સૌથી મોટી જરૂરિયાત છે. દિગ્દર્શક અનિશ શાહે ખૂબ જ બારીકાઈથી બતાવ્યું છે કે કેવી રીતે સ્કેમર્સ આપણા જ ડેટાનો ઉપયોગ કરીને આપણને માનસિક રીતે તોડી નાખે છે. ઇન્દિરા મોશન પિક્ચર્સ અને નવેમ્બર ફિલ્મ્સ દ્વારા નિર્મિત આ ફિલ્મ માત્ર એક મનોરંજક થ્રિલર નથી, પરંતુ ડિજિટલ યુગના અંધકાર સામે લડવાની પ્રેરણા આપે છે.

ફિલ્મની વાર્તા અર્જુન શાહ (મલ્હાર ઠાકર) અને તેના મધ્યમવર્ગીય પરિવારની આસપાસ વણાયેલી છે. એક તરફ માતા હોસ્પિટલમાં છે અને બીજી તરફ અર્જુનના પિતા ભદ્રેશ શાહ (પ્રશાંત બારોટ) પર એક અજાણ્યો કોલ આવે છે જે આખા પરિવારને હચમચાવી દે છે. પોલીસના નામે આવતા ફેક વિડિયો કોલ્સ અને ‘ડિજિટલ અરેસ્ટ’ ના નામે થતી લૂંટના દ્રશ્યો તમને સીટ પર જકડી રાખશે. લેખકો હિમાલય દવે, અંકિત ગોર અને દેવ મહેતાએ સાયબર ક્રાઈમના પાસાઓ પર કરેલું ઊંડું સંશોધન પડદા પર સ્પષ્ટ દેખાય છે.

મલ્હાર ઠાકરે ફરી એકવાર સાબિત કર્યું છે કે તે ગંભીર ભૂમિકાઓમાં પણ એટલો જ પાવરફુલ છે. અર્જુન શાહની લાચારી અને પછી તેનો વળતો પ્રહાર શાનદાર છે. મલ્હારના મિત્ર ‘બંટી’ ના રોલમાં શ્રુહદ ગોસ્વામીએ કમાલ કરી છે, બંનેની કેમિસ્ટ્રી ફિલ્મને જીવંત બનાવે છે. પ્રશાંત બારોટ, જય ભટ્ટ, પ્રતીક રાઠોડ, આરતી દેસાઈ અને રવિ રંજન જેવા કલાકારોએ ફિલ્મના પ્લોટને મજબૂતી આપી છે.

ફિલ્મનું સૌથી મોટું જમા પાસું તેનું મ્યુઝિક છે. ખાસ કરીને રેપ સોન્ગ ‘છળકપટની ધરપકડ’ અત્યંત પ્રભાવશાળી છે. આર્યન સૌરવના ધારદાર લિરિક્સ અને જપજીનું મ્યુઝિક કમ્પોઝિશન ફિલ્મમાં એક અલગ જ એડ્રેનાલિન થ્રિલ ઉમેરે છે. સાયબર દુનિયાના અંધકારને આ ગીત દ્વારા ખૂબ જ સચોટ રીતે વણી લેવામાં આવ્યો છે. જપજી અને પ્રતિકાના વોકલ્સ ફિલ્મના ક્રાઈમ થ્રિલર મૂડને વધુ ગાઢ બનાવે છે.

‘ધરપકડ’ એ માત્ર મનોરંજન નથી, પણ એક સામાજિક ચેતવણી છે. આ ફિલ્મ આપણને શીખવે છે કે ઇન્ટરનેટ એ એક એવું જાળું છે જ્યાં તમારી એક નાની ભૂલ તમને મોટી મુશ્કેલીમાં મૂકી શકે છે. જો તમે કંઈક નવું, રોમાંચક અને જાગૃતિ ફેલાવતું જોવા માંગતા હોવ, તો આ  ફિલ્મ ચોક્કસ જોવી જોઈએ.

સંબોધન મેગેઝિન તરફથી અમે આ ફિલ્મને 4/5 સ્ટાર્સ આપીએ છીએ.