વિજયગીરી બાવાની નવી ગુજરાતી ફિલ્મ ‘અંબા’નું પ્રથમ ભક્તિમય ગરબા ગીત ‘અંબા રમવા આવે’ લોન્ચ

Song lInk- https://youtu.be/_-pmr1mPRbk

નીમટ્રી એન્ટરટેઇનમેન્ટ અને વિજયગીરી ફિલ્મ ઓએસ દ્વારા શ્રી પરિમલ નાથવાણીના આશીર્વાદ સાથે નિર્મિત આગામી બહુચર્ચિત ગુજરાતી ફિલ્મ ‘અંબા’નું પાવન અને ભક્તિમય ગરબા ગીત ‘અંબા રમવા આવે’ સત્તાવાર રીતે લોન્ચ કરવામાં આવ્યું છે. ભૂમિ નાથવાણી દ્વારા નિર્મિત અને જાણીતા ફિલ્મમેકર વિજયગીરી બાવા દ્વારા દિગ્દર્શિત આ ફિલ્મ આગામી ડિસેમ્બર ૨૦૨૬માં સિનેમાઘરોમાં રિલીઝ થવા જઈ રહી છે.

આગામી ફિલ્મ ‘અંબા’ ગીરના પંથકમાં માનવ અને સાવજ વચ્ચેના અનોખા અને ભાવનાત્મક સંબંધો, સહજીવન, ત્રાડ અને ઝાંઝરીની દોસ્તી પર આધારિત એક અત્યંત અનોખી વાર્તા રજૂ કરે છે. ગુજરાતના ગૌરવ સમાન સાવજ અને તેમની સાથેના સહજીવનની આ અદ્ભુત ગાથા ગુજરાતની સંસ્કૃતિને નવી જ ઊંચાઈઓ પર લઈ જાય છે. વિજયગીરી બાવા અને રામ મોરી દ્વારા લિખિત આ ફિલ્મમાં રીવા રાચ્છ મુખ્ય ભૂમિકામાં જોવા મળશે, જ્યારે તેમની સાથે દર્શન પંડ્યા, જગજીતસિંહ વાઢેર, એલેસાન્ડ્રા વ્હીલન, ગૌરાંગ આનંદ, ફિરોઝ ઈરાની, સ્વાતિ દવે અને રિદ્ધિ ડાંગર જેવા અનુભવી કલાકારો મહત્વપૂર્ણ પાત્રો ભજવી રહ્યા છે.

ફિલ્મનું આ પ્રથમ મ્યુઝિકલ ગરબા ગીત સંગીતકાર જોડી કેદાર અને ભાર્ગવ દ્વારા ભક્તિ અને ઉત્સાહના અનોખા મિશ્રણ સાથે તૈયાર કરવામાં આવ્યું છે. આ વિશેષ ગીતમાં મુખ્ય અભિનેત્રી રીવા રાચ્છ સાથે ગુજરાતી સિનેમાની જાણીતી અને લોકપ્રિય અભિનેત્રીઓ મોનલ ગજ્જર, નેત્રી ત્રિવેદી અને શ્રદ્ધા ડાંગર પણ ખાસ જોવા મળે છે, જેમની હાજરી ગીતની ભવ્યતામાં મોટો વધારો કરે છે. આ ઉપરાંત, ગરબાના દ્રશ્યોમાં પાઘડી પહેરેલો સિંહ તથા દિગ્ગજ કલાકારો ફિરોઝ ઈરાની અને સ્વાતિ દવે ખાસ આકર્ષણનું કેન્દ્ર બન્યા છે. આ ગીતની કોરિયોગ્રાફી સમીર અને અર્શ તન્ના દ્વારા કરવામાં આવી છે, જેમણે અગાઉ સંજય લીલા ભંસાલીની ફિલ્મોમાં પણ યાદગાર કોરિયોગ્રાફી કરી છે. આ ગીત મિલિન્દ ગઢવી દ્વારા લખવામાં આવ્યું છે અને તે વ્રત્તિની પુરોહિત દ્વારા અદભુત રીતે ગાવામાં આવ્યું છે.

નિર્માતા અને દિગ્દર્શકના જણાવ્યા અનુસાર, આ ગીત માત્ર એક ઉત્સવનો ગરબો નથી પણ મા અંબા પ્રત્યેની શ્રદ્ધા અને ગીર તથા ગુજરાતની સમૃદ્ધ સંસ્કૃતિનું પ્રતીક છે. આ ભક્તિમય ગરબા ગીત આગામી તહેવારોની મોસમમાં ખેલૈયાઓ માટે મુખ્ય આકર્ષણ બનશે. હાલમાં આ ગીત નીમટ્રી એન્ટરટેઇનમેન્ટ અને વિજયગીરી ફિલ્મ ઓએસની યુટ્યુબ ચેનલ સહિત તમામ જાણીતા મ્યુઝિક પ્લેટફોર્મ્સ પર શ્રોતાઓ માટે ઉપલબ્ધ છે.